لاہور......... وزیراعظم سید یوسف رضا گیلانی نے کہا ہے کہ حکومت صرف اپنے عوام کو جواب دہ ہے، ہم کسی کی خواہشات کی تکمیل نہیں کر سکتے وہی کرینگے جو ملکی مفاد میں ہو گا، چیف آف آرمی اسٹاف کی مدت ملازمت میں توسیع انتظامی معاملہ ہے اسے سیاسی رنگ نہ دیا جائے، افغان ٹرانزٹ ٹریڈ کے جائزہ کیلئے وزارتی کمیٹی تشکیل دیدی ہے، حکومت میڈیا پر ہر گز پابندی نہیں لگائے گی،رمضان میں چینی کی قلت ہوئی تو متعلقہ اداروں کیخلاف ایکشن لوں گا، وزیراعلیٰ پنجاب شہباز شریف کا رحمن ملک پر دہشت گردی کے حوالے سے معلومات شیئر نہ کرنے کا الزام غلط ہے۔ان خیالات کا اظہار انہوں نے جنرل ہسپتال لاہور میں مسلم لیگ(ن)کے رہنما جاوید ہاشمی کی عیادت کے بعد میڈیا سے گفتگو کرتے ہوئے کیا۔وزیراعظم سید یوسف رضا گیلانی نے کہا کہ وزیر اعلیٰ پنجاب محمد شہباز شریف کی طرف سے یہ الزام غلط ہے کہ وزیر داخلہ کے کہنے پر قانون نافذ کرنے والے ادارے پنجاب حکومت کے ساتھ تعاون نہیں کر رہے ۔انہوں نے کہا کہ ایسا ہر گز نہیں جبکہ تمام ادارے رحمن ملک کے ماتحت بھی نہیں۔ وزیر اعظم نے کہا کہ موجودہ حکومت کے دور میں میڈیا پر ہر گز پابندی نہیں لگائی جاسکتی کیونکہ میرا خود میڈیا سے تعلق ہے۔ میڈیا نے جمہوریت کی بحالی کیلئے بہت جدوجہد کی ہے لہٰذا موجودہ جمہوری دور میں میڈیا پر پابندی نہیں لگ سکتی۔وزیر اعظم نے ایک سوال کے جواب میں کہا کہ چیف آف آرمی اسٹاف کی مدت ملازمت میں توسیع انتظامی معاملہ ہے، تاہم اس پر تبصرہ نہیں کیا جاسکتا۔وزیر اعظم نے کہاکہ ایچ ای سی کے چیئرمین کی ان سے کوئی ملاقات نہیں ہو ئی جبکہ گزشتہ روز محکمہ تعلیم کے افسران کی ان سے ہونیوالی ملاقات کا جعلی ڈگریوں سے کوئی تعلق نہیں۔انہوں نے کہا کہ جعلی ڈگریوں کا معاملہ اب الیکشن کمیشن میں جا چکا ہے۔