مظفر آباد ............آزاد کشمیر کے نئے وزیراعظم کے انتخاب کے لئے منگل کو صرف مسلم کانفرنس کے صدر سردار عتیق احمد خان نے کاغذات نامزدگی داخل کرائے ہیں۔ اس طرح سردار عتیق بلامقابلہ وزیراعظم آزاد کشمیر منتخب ہوگئے۔ تاہم قواعد و ضوابط کے مطابق کل ووٹنگ ہوگی۔راجہ فاروق حیدر کے گروپ نے صدر ریاست پر جانبداری کا الزام لگاتے ہوئے احتجاجاً کاغذات نامزدگی جمع نہیں کروائے ۔ 49 اراکین آئندہ 11 ماہ کیلئے شو آف ہینڈ کے ذریعے اپنی رائے کا اظہار کرینگے۔ قبل ازیں آزادکشمیر قانون ساز اسمبلی کا اجلاس ہوا‘ صدارت اسپیکر شاہ غلام قادر نے کی۔ وزیراعظم آزادکشمیر کے مستعفی ہونے کے بعد تحریک عدم اعتماد پر رائے شماری اور بحث نہ ہوسکی اور اجلاس مختصر رسمی کارروائی کے بعد ملتوی کردیا گیا۔