نابلس............. مغربی کنارے کے شہر نابلس کے مشرق میں برگزیدہ پیغمبرحضرت یوسف علیہ السلام کے مزار پر یہودی آباد کاروں نے حملہ کردیا۔جس سے مقبرے کو جزوی طور پر نقصان پہنچا۔مرکز اطلاعات فلسطین کے مطابق نابلس کے مشرق میں حضرت یوسف علیہ السلام کے مزار پر 600 یہودی آباد کاروں نے داخل ہو کر مقدس مقامات کی بے حرمتی کی۔ اس دوران انتہا پسند صیہونیوں نے تلمودی تعلیمات کے مطابق مذہبی رسوم بھی ادا کیں جبکہ مقبرے پرحملے کے دوران اسرائیلی فوج اور پولیس کی بڑی تعداد بھی موقع پر موجودتھی لیکن وہ صرف خاموش تماشائی بنی رہی۔ ادھر اسرائیلی فوج کی ایک بڑی تعداد نے نابلس میں بلاطہ مہاجر کیمپ میں داخل ہو کر گھر گھر تلاشی لی تاہم کسی شخص کی گرفتاری سے متعلق کسی قسم کی اطلاعا ت موصول نہیں ہو سکیں۔ دوسری جانب اسرائیلی فوج نے دعوی کیا ہے کہ رات گئے شہر کے مشرق میں مزاحمت کاروں کی طرف سے فوریک کے علاقے میں صیہونی فوج پر کمین گاہ سے حملہ کرنے کی کوشش کی تاہم فوج کی گشتی پارٹی نے مزاحمت کاروں کا یہ حملہ ناکام بنا دیا گیا ہے۔