اسلام آباد .............. وزیراعظم سیّد یوسف رضا گیلانی نے کہا ہے کہ چیف آف آرمی اسٹاف جنرل اشفاق پرویز کیانی کی مدت ملازمت میں توسیع بیرونی دباؤ پر نہیں کی گئی، دہشت گردی کیخلاف جنگ میں تسلسل اور خطے میں استحکام کیلئے توسیع ناگزیر تھی، صدر، وزیراعظم، آرمی چیف اور سپریم کورٹ کے چیف جسٹس کی مدت 2013ء تک ہے اور ان کی پوزیشن محفوظ ہے، سب کو آئین کے دائرے میں رہ کر کام کرنا چاہیے،حکومت نظام میں تبدیلی لانے کیلئے پُرعزم ہے، افغان ٹرانزٹ ٹریڈ کا معاہدہ حتمی نہیں، جعلی ڈگری والے ارکان کی حمایت کا تاثر درست نہیں، وزارت تعلیم اور ہائیر ایجوکیشن کمیشن کو قواعد و ضوابط کی پابندی کرنی چاہیے، یتیم اور بے سہارا بچوں کیلئے ملک بھر میں سوئٹ ہومز بنائیں گے۔ ان خیالات کا اظہار وزیراعظم نے جمعہ کوسہالہ میں پاکستان بیت المال کے زیر اہتمام یتیم اور بے سہارا بچوں کیلئے قائم سوئٹ ہوم کے دورے کے موقع پر تقریب سے خطاب اور بعد ازاں صحافیوں سے گفتگو کرتے ہوئے کیا۔ وزیراعظم نے کہا کہ پاکستان اس وقت نازک دور سے گزر رہا ہے اور ہم دہشت گردی کے خلاف جنگ میں مصروف ہیں، خطے میں استحکام، امن اور دہشت گردی و عسکریت پسندی کے خلاف جنگ اور پالیسیوں کے تسلسل کیلئے چیف آف آرمی اسٹاف جنرل اشفاق پرویز کیانی کی مدت ملازمت میں توسیع کی گئی ہے اور ان کی توسیعی مدت کا تعین کر دیا گیا ہے۔ ایک سوال کے جواب میں انہوں نے کہا کہ چیف آف آرمی سٹاف کی مدت ملازمت میں توسیع کیلئے کوئی بیرونی دباؤ نہیں تھا۔ افغان ٹرانزٹ ٹریڈ کے بارے میں ایک سوال کے جواب میں انہوں نے کہا کہ ابھی صرف لیٹر آف انڈر اسٹینڈنگ پر دستخط ہوئے ہیں، حتمی معاہدہ نہیں ہوا۔ وزیر خزانہ، وزیر تجارت اور وزیر خارجہ کو انہوں نے ہدایت کی ہے کہ وہ اس حوالے سے میڈیا، سیاسی جماعتوں اور پارلیمنٹ کی قومی سلامتی کمیٹی کو صحیح صورتحال سے آگاہ کریں تاکہ اس حوالے سے پائی جانے والی غلط فہمی دور ہو سکے۔وفاقی وزیر ہاؤسنگ و تعمیرات کے خلاف عائد کیے جانے والے الزامات کے بارے میں ایک سوال کے جواب میں وزیراعظم نے کہا کہ الزامات تو صرف الزامات ہوتے ہیں، اگر کوئی ثبوت ہیں تو وہ سامنے لائے جانے چاہئیں۔ قبل ازیں تقریب سے خطاب کرتے ہوئے وزیراعظم نے کہا کہ ہم نے قوم سے وعدہ کیا تھا کہ عسکریت پسندی و دہشت گردی کی وجہ سے بے گھر ہونے والے اور یتیم اور بے سہارا بچوں کیلئے ملک بھر میں سوئٹ ہومز تعمیر کیے جائیں گے،