اورکزئی میں جیٹ طیاروں کی بمباری، 39 جنگجو ہلاک، باجوڑ میں بم دھماکا، امن لشکر کے سربراہ سمیت 3 ہلاک
ہنگو/ سوات............... اورکزئی ایجنسی کے مختلف علاقوں میں جیٹ طیاروں کی بمباری سے 39 جنگجو ہلاک اور 15 زخمی ہوگئے۔ باجوڑ میں ہونے والے 2بم دھماکوں میں امن لشکر کے سربراہ سمیت 3 افراد مارے گئے جبکہ پشاور اور مردان میں میں سرچ آپریشن کے دوران 170سے زائد مشتبہ افراد کو گرفتار کرکے اسلحہ برآمد کرلیا گیا۔ خیبر ایجنسی میں نیٹو کیلئے سامان لے جانیوالے 100 کنٹینرز روک لئے گئے۔ شکارپور میں پولیس نے بارود سے بھرے دو ٹرک پکڑ لئے۔ سوات کی انسداد دہشت گردی عدالت نے مولانا فضل اللہ کو بھی اشتہاری قرار دیتے ہوئے 7 روز کے اندر عدالت میں پیش کرنے کا حکم دیدیا جبکہ کالا کلے میں مقامی لشکر کی کارروائی میں مطلوب عسکریت پسند یوسف عرف اسامہ ہلاک ہوگیا۔ تفصیلات کے مطابق سیکورٹی فورسز کی جانب سے اپراورکزئی ایجنسی کے علاقے غادے زئی اور غنڈگئی میں بمباری کی گئی جس میں شدت پسندوں کے ٹھکانوں کو نشانہ بنایا جس کے نتیجے میں 39 شدت پسند ہلاک اور متعدد زخمی ہوگئے۔ کارروائی کے دوران شدت پسندوں کے متعدد ٹھکانے بھی تباہ کردیئے گئے۔ پشاور میں جاری آپریشن کے دوران قانون نافذ کرنے والے اداروں نے مشترکہ کارروائی کے دوران پشاور کے علاقے چار سدہ روڈ، مردان اور نوشہرہ کے علاوہ دیگر علاقوں میں آپریشن کے دوران 170 مشتبہ افراد کو گرفتار کرلیا۔ قانون نافذ کرنے والے اداروں کا کہنا ہے کہ گرفتار کئے جانے والے مشتبہ افراد سے بھاری مقدار میں اسلحہ بھی برآمد کرلیا ہے۔
