راولپنڈی،سوات، مہمند ایجنسی ..... پاک فوج نے سوات میں زیارت بابا سر، میدن، کالام اور سخرہ تک کے علاقوں سے دہشت گردوں کا مکمل صفایا کرکے امن قائم اور حکومتی رٹ بحال کر دی۔ لوند خوڑ میں چھاپے کے دوران فضل اللہ کے 5 کمانڈرگرفتار کر لئے تھے ادھر مہمند ایجنسی میں دہشت گردوں کے مبینہ ٹھکانوں پرگولہ باری کی گئی جبکہ پاک فوج کا کہنا ہے کہ کالام اور مدین میں آپریشن مکمل کرلیا گیا ہے اور اس آپریشن میں 358 دہشتگرد اور 9 اہلکار شہید ہوئے۔تفصیلات کے مطابق آئی ایس پی آر کی جانب سے میڈیا ٹیم کو کالام کا دورہ کرانے کے موقع پر میڈیا سے گفتگو کرتے ہوئے بریگیڈیئر محمد زبیر خان نے کہا کہ افواج نے سوات کے بالائی علاقوں زیارت باباسر سے لیکر مدین، بحرین، کالام، سخرہ اور دیگر علاقوں کو دہشت گردوں سے پاک کر دیا ہے اور اب پورے علاقے میں امن قائم اور حکومتی رٹ قائم ہو چکی ہے ۔انہوں نے کہاکہاس آپریشن میں 358دہشت گرد ہلاک ہو چکے ہیں اور 385کو گرفتار کر لیا گیا ہے جبکہ191نے خود کوفورسز کے حوالے کر دیا ہے۔ انہوں نے کہا کہ اس پوری کارروائی کے دوران سکیورٹی فورسز کے 9جوان جاں بحق اور54زخمی ہو چکے ہیں۔ دہشت گردوں کے قبضے 881رائفلز برآمد کئے گئے ہیں جن میں232سب مشین گن بھی شامل ہیں انہوں نے کہا کہ ان علاقوں میں اب فوج کے ساتھ ساتھ پولیس بھی تعینات ہے ۔